PSK-Partiya Sosyalîst a Kurdistan

» Gündem
» Basın Açıklamaları

Yekîtîya Neteweyî û Azadiya Kurdistanê Dikare Birînên Qirkirina Helepçeyê Bipêçe

37 sal di ser qirkirina Helebçeyê re derbas bû.

Balafirên rejîma kolonyalîst a Seddam yên şer, di 16'ê Adara 1988'an de Helebce bi çekên kîmyewî ve bombebaran kirin. Di vê qetlîamê de zêdeyî 5000 kesî jiyana xwe ji dest dan. Pirê wan zarok, jin, kal û pîr bûn. Bi deh hezaran kes jî birîndar bûn û gelek jê seqet man.

Armanca wê êrîşa roja 16ê Adarê ya bi çekên kîmyavî, qedandina hemû jîndar û jîndarîya li Kudistanê bû. Helqeyek ji jenosîda Kurdan e.

Qirkirina Helebce beşek ji Operasyonên BAAS bû. Wan operasyonên rejima hov di Çileyê 1988an de bi navê Operasyonên Enfal dest pêkiribûn. Weka ku berpirsên rejimê jî wê sûcê xwe pejirandi û gotin, armanca Operasyonên Enfalê, qirkirina Kurdan û tunekirina Kurdistanê bû.

Di Operasyona Enfalê ya navbera salên 1987-1990î de 182 hezar Kurd hatin kuştinê. 75 hezar Kurd sirgûn kirin Başûrê Iraqê an jî gelekên wenda kirin. Di vê pêvajoyê de 4500 gundên Kurdan û bajarên Kala Diza, Helebce û Seyîd Sadık hatin wêrankirinê. Berîya wî jî 8000 kesên ji Berzanîyan hatibûn tasfiyekirin.

Komkujîya Helebçeyê sûceka mezin a li dijî mirovahiyê pêkhatîyê ye û xaleka reş a mezin e li ser rûyê mirovatîyê.

Komkujiya Helebçeyê bi piştgiriya dewletên mezin û li ber çavên cîhanê pêk hat.

Dewletên cîhanê li hemberî qirkirina Helebce bêdeng man û bûn şirîkê vê sûcê mezin.

Di dema qirkirina Helebçeyê de, dewletên herêmê, Cîhana Ereban, Yekîtiya Sovyetê, Japonya, Çîn, dewletên Ewropayê û DYA bêdeng man û çavê xwe li vê qirkirinê re girtin.

Ew dewletên cîhanê yên ku wê rojê çavên xwe li qirkirina Helebçeyê girtin û bêdeng man, îro jî çavên xwe li êrîş û komkujîyên ku çar dewletên dagirker li ser gelê Kurd û dagirkirina wan a Kurdistanê digirin.

Gelê Kurd dikare bi tifaq û yekîtîyeke netewî a li ser berjewendîyên Gelê Kurd û Kurdistanê pêk bê ve serî bi wan planên xayîn derke.

Tenê yekîtîyeke berfireh û demoqratî a li ser berjewendîyên Gelê Kurd yên netewî pêk bê dikare wan pilan û defikên xayîn bişkîne, belawela bike.

Di nava şert û mercên dijwar de jî, Têkoşîna Azadiya Kurdistanê bi bîr û biryariyeke qewî berdewame, didome. Çawa ku, qirkirinên Helebce û Enfalê nekarîbûn pêşî li têkoşîna azadiyê ya gelê me bigirin, êrîş, komkujî, dagirkerî û qirkirina îro li dij gelê me têne meşandinê jî nikarin meşa me ya azadîyê rawestînin.

Miletê Kurd xwedîyê edetên berxwedaneke kûr û dîrokî ye. Gelê Kurd, di tu gavekê wê serî li pêş dagirkerîyê, kedxwarîyê, zilm û zordarîyê netewandîye. Ji vir şûnda jî, gelê me wê ji bona jîyaneke bi rûmet, ji bona di welatê xwe de azad û serfiraz bijî her li ser pîyabe û li mafê xwe yê xwe birêvekirînê xwedî derkeve.

Bi qwasê misqalek jî şik bi me re tune ye. Em bawerin ku emê di tekoşîna azadîya gelê xwe de bi ser bikevin.

E bi vê minasebetê bangê li Sazîya Neteweyên Yekbûyî dikin! Divê Sazîya Neteweyên Yekbûyî, komkujîya Helepçê bi awakî fermî nasbike, bipejirîne û wek komkujîyek li dijê mirovatîyê pênase bike.

Em di 37’emîn salvegera qirkirina Helebçeyê de, hemû berpirsîyar û alîgirên vê qirkirinê careke dinê şermezar dikin.

Em hemû şehîdên Helepçê û yên Kurdistanê, bi rêz û huemet bi bîr tînin.

16.03.2025

Partiya Maf û Azadîyan (HAKPAR)

Partiya Sosyalîst a Kurdistan (PSK)

Partiya Welatparêzên Kurdistan (PWK)

Partîya Demokrat a Kurdistan Bakur (PDK Bakur)

İçerik Başlıkları

En çok Okunan İçerik

Yorum Yaz