Siyaseta dagîrkerî û êrîşên Dewleta Tirk li Kurdistana Başur û Rojavayê Kurdistanê roj bi roj zêdetir dibin.
Firokeyên şer yên Dewleta Tirk her roj êrîşî ser gund û bajarokên Kurdistanê dikin. Di encama van êrîşan de gund xirap û wêran dibin, zevî, zozan, bax û baxçe û daristan têne şewitandin û bi dehan kurdên sîvîl şehîd û birîndar dibin.
Artêşa bejayî ya Dewleta Tirk baregah û bingehên xwe yên leşkerî di herdu beşên Kurdistanê da, zêdetir û bihêztir dike.
Di wan rojên dawî de jî Dewleta Tirk û Hukûmeta AK Partîyê dixwaze ji aloziya li navçeyê û ji şerê Rûsya û Ûkraynayê îstîfade bike û bernameya xwe ya kîrêt bi cîh bike.
Serokkomarê Tirkiyeyê bi awakî eşkere û li ber çavê cîhanê ragihand ku ji bona parastina “ewlehîyaTirkiyeyê” wê navçeyeke ewle li ser ”tixubên xwe” bi kûrahîya 30 kîlometran ava bikin.
Bêguman Dewleta Tirk dixwaze ku bi henceta “parastina ewlehiya netewî ya Tirkiyeyê” bala xelkê bikşine aliyekî din û herweha dijminahîya kurdan xurttir bike.
Eşkere ye ku li ser ”tixûbên Tirkîyeyê” avakirina ”navçeyek ewle” dê rewşa Rojhilata Navîn aloztir bike. Ev, nişana dijminahîya Dewleta Tirkya ya li dijî deskevtên neteweyî yên miletê Kurd e.
Ev, Peyameke ji bo bîrûraya giştî û bi taybetî ji bo NATO ye ku dixwaze bibêje “bona ku ez li pêşiya endambûna Swêd û Fînlandîyayê nebim asteng, divê hun jî alîkariya min bikin û dengê xwe li hemberê min dernexin ku ez jî bikaribim Başûr û Rojavayê Kurdistanê dagir bikim û rê li ber statuyeke sîyasî ya miletê Kurd bigirim”.
Em weke PAK, PSK û TDK-TEVGER bangî hemû hêz û rêxistinên welatparêz yên her çar perçeyên Kurdistanê û bi taybeti bangî Parlamento, Hikumet û Serokatiya Herêma Kurdistanê dikin ku li dijî vê plana dagirkerya Dewleta Tirk bi yekdengî û yekhelwestî tevbigerin.
Em ji PYNK, ENKS û hemû hêzên siyasî yên kurdên Rojavayê Kurdistanê daxwaz dikin ku bona pêşîlêgirtina van êrîş û planên DewletaTirk, divê ew di zûtirîn demê de, li ser bingeha ”Peymana Hewlêr û Dihokê” yêkitiya xwe pêk binin û Pêşmergeyên Rojê bêqeyd û şert bikaribe vegere Rojavayê Kurdistanê.
Divê PKK demildest dest ji vê sîyaset, çalakî û kiryarên xwe yên ku li Başûr û Rojavayê Kurdistanê dimeşîne û rê li ber êrîş û sîyaseta dagirkerîya Dewleta Tirk xweştir dike berde.
Em daxwaz ji hêzên demokrat û aştîxwaz yên Tirkiyeyê dikin ku li dijî van planên kîrêt derkevin û piştgirîya xebata azadîxwazîya gelê Kurd bikin.
Em ji bîrûraya giştî ya cîhanê, ji dewletên mezin yên Rojava û NATOyê daxwaz dikin ku serên xwe li hemberî van daxwazên DewletaTirk neçemînin; nebin şirîkên van kiryarên qirêj yên li ser xwîna kurdan têne bazarkirin û piştgirîya doza miletê Kurd ya neteweyî û demokratîk bikin.
Em bangî Dewleta Tirk jî dikin ku dest ji vê sîyasta xwe ya êrîşker û dagirkerî ya li ser dijayetîya kurdan hatîye avakirin berde; li her perçeyekî Kurdistanê rêzê li îradeya miletê Kurd bigire. Hemû pirs û pirsgirêkên miletê Kurd û kurdistanîyan divê bi rêyên dîyalogê bêne çareser kirin.
25ê Gulana 2022yê
PAK (Partîya Azadîya Kurdistanê)
PSK (Partîya Sosyalîst a Kurdistanê)
TDK-TEVGER (Tevgera Demokratîk a Kurdistanê)
Firokeyên şer
ên dewleta Tirkîyeyê roja yekşemê, 20.11.2022yê, êrîşên nû birin ser Başûr û
Rojavayê Kurdistanê.
Dewleta Îranê
jî şeva derbasbûyî bi hêzek mezin û bi çekên giran ketin nav bajarê Mihabadê yê
Rojhilatê Kurdistanê û elektrîk li ser bajêr qut kirin û bi berdewamî dengên
teqeyan dihên bihîstin.
Êrîşen dewleta Tirkîyeyê
yên li ser Başûr û Rojavayê Kurdistanê
Li gorî
agahdarîyên heyî, Tirkîyeyê, îro serê sibeha yekşemê, 20ê teşrîna 2022ê, bi firokeyên
şer, Kobanî û Girê Sipî ya Rojavayê Kurdistanê kirîye armanc.
Herweha li
Başûrê Kurdistanê jî li Qeladizê, Ranye, Soran, Riwanduz û Pênciwên dengê
firokeyên şer ên Dewleta Tirkîyeyê hatine bihîstin û artêşa Tirkîyeyê çend cîh
li Çiyayê Qendîl, Asos û Biradostê kirine armanc.
Li gorî
agahdarîyên ku di ragîhandinê da belav bûne, di encama êrîşên ku artêşa
Tirkîyeyê li Rojavayê Kurdistanê kirine, kuştî û birîndar hene.
Dewleta
Tirkîyeyê, divê ji tecrubeyên xwe yên 99 salî bizanibe û bibîne ku bi
operasyonên leşkerî, bi êrîş û kuştin û girtin û hefs kirinan tu mesele nehatine
çareser kirin û dê neyên çareser kirin jî.
Ev ne cara
yekem e ku Tirkîye êrîşên bi vî rengî dike. Me berê jî gelek caran êrîşên bi vî
rengî şermezar kiriye û em nuha careke din jî van êrîşên Tirkîyeyê yên li ser
Başûr û Rojavayê Kurdistanê şermezar dikin û em dibêjin demildest divê dawî li
van êrîşan bêne anîn.
Divê dewleta
Tirkîyeyê dest ji vê sîyaseta xwe ya li ser dijayetîya kurdan hatîye ava kirin
berde û divê berîya her tiştî ji bo çareserîyeke bi rêyên sîyasî, bi partîyên
kurd û kurdistanî yên li Bakurê
Kurdistanê dest bi dîyalogê bike.
Divê PKK jî dest ji vê sîyaset, çalakî û kiryarên xwe yên ku
zerarê dide doza miletê Kurd û destkeftîyên kurdan û rê li ber êrîşên dewleta
Tirkiyeyê xweş dike, berde.
Divê Netewên
Yekbûyî û Hêzên Hevpeyman ên Navdewletî jî bi biryar û helwestên xwe, rê li ber
van êrîşan bigirin.
Êrîşen dewleta Îranê yên
li ser Başûr û Rojhilatê Kurdistanê
Dewleta Îranê
ji ber ku li himberî serîhildana gêlê Rojhilatê Kurdistanê û gelên Belûcî,
Faris, Azerî, Ereban şikesteke mezin xwar; dixwaze bi êrîşên leşkerî yên li ser
baregehên partîyên Rojhilatê Kurdistanê
û yên li bajarên Rojhilatê Kurdistanê, heyfa xwe bistîne û vê şikesta xwe
binixumîne.
Piştî êrîşên
leşkerî yên li ser baregehên li Başûrê Kurdistanê yên partîyên Rojhilatê
Kurdistanê, nuha jî Dewleta Îranê bi hêzên leşkerî êrîşan dibe ser gelê me yê
li Rojhilatê Kurdistanê. Bi çekên giran çûyîna hêzên leşkerî yên Îranê yên
nav bajarê Mihabadê nîşana wê yekê ye ku dewleta Îranê dikare qetlîamên
mezin li ser gelê Rojhilatê Kurdistanê pêk bîne.
Ji bo ku dewleta
Îranê van êrîşên xwe rawestîne û dawî li van zilm, zordarî û neheqîyên Îranê bê
anîn, divê Netewên Yekbûyî, Yekitîya Ewropa û Emerîka û dewletên mezin
helwesteke cidî bigirin.
Em van êrîşên
Îranê şermezar dikin û piştgirîya xuşk û birayên xwe yên Rojhilatê Kurdistanê û
gelên Îranê dikin.
20.11.2022
PAK (Partîya Azadîya Kurdistanê)
PSK (Partîya Sosyalîst a Kurdistan)
TDK-TEVGER (Tevgera Demokratîk a Kurdistanê)
Partiya Sosyalîst a Kurdistan © 2022
