Pîrozkirina Newrozê li Qada Şêx Seîd
Îro 20.03.2023 ê li Qada Şêx Seîd ya Diyarbekirê PAK,
PSK,TDK-TEVGER pêkve Newroz Pîrozkirin.
Bi boneya Cejna Newrozê Kadirên rêvebir, endam, aligirên
PSK, PAK, TDK-TEVGER û welatiyên ku beşdar bun carek dî qurbaniyên erdhejê
bibîr anîn. Wêneyên ku dîmenên erdhejê li ser bun raxistin û jibo yadkirina
qurbaniyan mum li ber hilkirin.
Despêkê Endamê Rêvebiriya PAKê Henefî Turan xêrhatin û
pîrozbayî li beşdaran kir û peyama hevbeş ya Newrozê jî Endamê Rêvebiriya PSKê
Serhad Amedî xwend. Di wextê xwendina peyamê da hêzên asayişe xwestin Al a
Kurdistanê bibin. Li ser vê destêwerdanê
û hewla jidest girtina al ê bo demek kurt alozîyek çêbu. Serhat Amedî
nerazîbuna xwe nişan da û ev bê tehemûliya li hember Ala Kurdistanê şermezar
kir û berdewamî da xwendina xwe ya peyama Newrozê.
Peyvdarê PAK ê Henefî Turan
li ser bêtehemulî û hewla jidest girtina Al a Kurdistanê bertek nişan da
û got “kes nikare rê li ber bilindkirina al a Kurdistanê bigire. Ev al dê li
ser van birc û bedenen Amedê jî were daliqandin.
Di dawiyê da Henefî Turan ragihand ku hersê alî PAK, PSK û TDK- TEVGER bi hevra dê sibê pêkve
jibo gehandin û belavkirina alîkariyan
li ziyandîtiyên erdhejê berê xwe bidin bajarê Semsûrê.
Çalakiya pîrozbahiyê bi dirûşma Bijî Newroz bi dawî bu.
NEWROZ LI HEMÛ KURDISTANÎYAN PÎROZ BE!
Îşev şeva Newrozê y e.
Newroz cejna hemû gel
û neteweyên Aryanî ye. Lê ji bo miletê Kurd
û gelên Kurdistanê cejna Newrozê xwedîyê cîyekî taybetî ye.
Kurd û hemî gelên
Kurdistanê Newrozê ji alîyekî weke cejna serêsalê û hatina biharê pîroz dikin;
ji alîyekî din jî weke roja serhildan, berxwedan û tekoşîna ji bo azadî û
serxwebûna Kurdistanê pîroz dikin.
Felaketa erdheja 6ê
sibatê ya ku li gelek bajarên Bakurê Kurdistanê û hinek bajarên Tirkîyeyê da rûdabû,
di eslê xwe da qetlîamek bû. Bi deh hezaran mirovan jîyana xwe ji dest dan, ji 150
hezarî zêdetir mirov jî birîndar bûn. Bi
milyonan mirov bêcîh û war man.
Ji ber wê jî em wek Miletê Kurd û gelên Kurdistanê mixabin,
ne bi şahî û dîlan û kêfê, lê bi êş û xem û birînên vê erdhejê pêşewazîya
Newrozê dikin.
Helbete ku, li gel
hemû felaket û qetlîam û zordestîyan jî,
divê em Newrozê, bi armanca li dijî dagîrkerî û zordariyê û weke sembola
berxwedana neteweyî û azadîyê pîroz bikin. Lewra Newroz li dijî dagirkerî,
înkar û asîmîlasyona miletê Kurd bûye roja
geşkirin û bihêzkirina mêjû û hişmendîya neteweyî û kurdistanî.
Li gel êş û birînên
me yên li her çar perçeyên Kurdistanê jî, Agirê Newrozê ku sembola hebûn,
serbilindî, biryardarî, hêvî, berxwedan, serîhildan û azadiyê ye; dê li
Rojhelat, Başûr, Rojava û Bakurê Kurdistanê, li her çar alîîyê cîhanê, bi
şêweyên cuda cuda bilind û gur bibe.
Li Bakurê
Kurdistanê pîrozkirina Newrozê xwedî cîhek taybetî ye. Lewra nêzî sed salî ye
ku li Bakurê Kurdistanê pîrozkirina Newrozê bi reng û naveroka xwe û bi awakî
azad nayê pîroz kirin û qedexe ye.
Di vê pêvajoya ku
zimanê kurdî bi jenosîda asîmîlasyonê rû bi rû ye, dive em bi taybetî Newrozê bi kurdî pîroz bikin; em hewl bidin ku
vê rojê bikin qad û derfetek girîng ji bo geşkirina axaftina bi zimanê Kurdî.
Herweha divê ev roj bibe platformek ji bo bidestxistina mafên perwerdeya bi
ziamnê kurdî, mafên civakî û çandî. Qadên pîrozkirina Newrozê divê bibin qadên
tekoşîna ji bo bidestxistina daxwazên neteweyî û demokratîk û bilind kirina têkoşîna mafê çarenivîsîna
miletê Kurd.
Miletê Kurd tenê bi
yekitî, hevkarî û yekrêziya neteweyî dê bikaribe destkeftiyên xwe biparêze û ji
bo azadî û serxwebûna Kurdistanê pêngavên biryardêr bavêje.
Li Bakurê
Kurdistanê rewşa heyî wezîfeyên taybetî derdixînê pêşîya me. Divê partî,
rêxistin û tevgerên Kurd û Kurdistanê û potansîyela herî berfireh a Kurdan rojek berî rojekê li ser
daxwazên acîl yên hevbeş bêne ba hevdû û ji bo hevkarîyeke berfireh a neteweyî,
demokratîk gavên pêwîst bavêjin. Bicîh anîna van wezîfeyên neteweyî û dîrokî , dê rêya
çareserîya pirsa Kurd û Kurdistanê xweştir
û dê destê gelê me xurtir bike.
Em hêvî dikin ku Newroza
îsal, ji bo yekitî, hevkarî û yekrêziya
neteweyî bibe destpêkekê. Divê em xwedîlêderketin, parastin û vejandina
hişmendî û destkeftiyên neteweyî, li her perçeyekî Kurdistanê di Newrozê da zêdetir derxînin
pêş.
Herweha dive bi
minasebeta Newrozê û piştî Newrozê jî, em
xebata gîhandina alîkarîyên pêwîst yên ji bo mexdûrên erdhejê berdewam bikin.
Bijî sembola
berxwedan û tekoşîna azadî û serxwebûnê Newroz!
Bijî yekrêziya hêzên
neteweyî û demokratîk yên Kurdistanê!
Bijî Newroz!
20.03.2023
– Partîya Azadîya Kurdistanê (PAK)
– Partiya Sosyalîst a Kurdistan (PSK)
– Tevgera Demokratîk a Kurdistanê (TDK-TEVGER)
PEYAMÊN PÎROZBAHÎYÊ JİBO 50 SALÎYA PSKÊ
Diyarbakır’da PSK 50. Kuruluş Yıldönümü Kitlesel Kutlandı
Bozyel: Önümüzdeki tarihi hedef Kürt halkının özgürlüğüdür. Sosyalizm ise ufuk çizgimiz olmaya devam ediyor.
PSK 50. Yılı İstanbul’da Coşkuyla Kutlandı Partiya Sosyalîst a Kurdistan © 2022