Ji çapemenî û raya giştî re
Partiya Sosyalîst a Kurdistanê di civîna xwe ya roja 08.10.2023ê ya bi
rêya Zoomê da pêşhatên dawî yên siyasî û mijarên din ên rojeva xwe nirxand û guncaw
dît ku encamên jêrîn ji raya giştî re rabigîhîne.
Krîza siyasî û aborî ya li
Tirkiyeyê her ku diçe kûr dibe, ji bo beşên mezin ên civakê encamên wêranker
derdixe holê. Li tevahiya Tirkiyeyê bêkarî zêde dibe,rewşa jiyanê pişta civakê dişikîne. Piraniya civakê
di bin xizanî û birçîbûnê de, di nava şert û mercên nemirovane de dijîn.
Di encama qeyrana siyasî û aborî
de her roj bi dehan jin tên kuştin, rêjeya xwekuştinê zêde dibe û kesên ku
hêviya xwe ji siberojê winda dikin ji Tirkiyeyê direvin.
Guman tê de nîne ku
çaresernebûna pirsgirêka Kurd, bingeha qeyrana heyîye ku, Tirkiye xistiye nav
tengasiyek kûr.
Sîyaseta şaş a li hember
pirsgirêka kurd ku li ser red, înkar
tund û tujî ev e bu sed sale tê domandin hemû enerjiya Tirkiyeyê
westandiye û Tirkîyê xistiye nav alozîyê.
Tirkiye ku bi salan e bi hinceta
PKKê li dijî Başûrê Kurdistanê û Herêmên Kurdên Sûriyeyê bênavber operasyonên
leşkerî dimeşîne, bi hinceta êrîşa bombeyî ya 1’ê Cotmehê ya li Enqereyê dozeke
leşkerî zêde kir. Di operasyonên leşkerî yên dawî de gelek kesên sivîl tên
kuştin, avahîyên aborî, av, enerjî û binesazîyên jiyanî yên li Herêma Kurdên
Sûrîyê tên wêrankirin û ev jî bûye sedema êş û azarên mezin ên mirovî û aborî.
Divê Tirkiye dev ji rêbazên
înkar, şîdet û şer berde ku sed sal in li ser pirsgirêka Kurd tên ceribandin.
Siyaseta anakronîk a li ser bingeha antî-Kurdîzmê êdî nayê domandin. Tişta ku
divê bê kirin destpêkirina pêvajoyeke aştiyane û siyasî ji bo pêkanîna daxwazên
neteweyî, demokratîk û rewa yên gelê kurd e.
Rêbaza şerê çekdarî ya ku ji
aliyê PKK’ê ve tê meşandin jî zû ve kevin bûye. Teqîn û êrîşên bi vî rengî yên
di meha Cotmehê de li Enqereyê hatin kirin, ne feyde lê zerarê dide gelê Kurd.
Çalakiyên bi vî rengî hem têkoşîna rewa ya gelê Kurd dixe bin siya xwe û hem jî
zirarê dide qadên têkoşînê yên hiqûqî û siyasî.
Divê PKK êdî dest ji kiryarên
xwe yên tundiyê berde.
Piştî hilbijartinên 28ê Gulanê
Serokomar Erdogan dîsa mijara makeqanûneke nû anî rojevê. Lê belê polîtîkayên
ku desthilatdariya heyî dimeşîne bi tevahî li dijî ruhê çêkirina makezagoneke
nû ye. Bi girtina partiyên Kurdistanê, bi dûrxistina bi sedan şaredarên
hilbijartî, girtina muxalîfan û rewşenbîran û astengkirina dengê opozîsyonê
destûreke nû nayê çêkirin.
Ji bo makezagoneke nû beriya her
tiştî divê hawîrdoreke demokratîk û azad bê avakirin û hewayeke aştiyane û
beşdariyê ku hemû beşên civakê tê de beşdarî pêvajoyê bibin bê avakirin.
Li aliyê din destûreke ku hebûna
gelê kurd qebûl neke, perwerde û statuya zimanê fermî nede zimanê kurdî û
sîstemeke nenavendî ya ku rê bide gelê kurd xwe bi xwe birêve bibe, pêşbînî
nake. Nabe makezagona nû. Destûreke wiha nikare pirsgirêkên bingehîn ên
Tirkiyeyê çareser bike.
Partiya Sosyalîst a Kurdistanê
ji destpêkê ve tekez kir ku çareseriya pirsgirêkên din ên bingehîn ên Tirkiyê
bi taybet pirsgirêka Kurd bi çêkirina destûreke nû ye. Partiya me girîngiyeke
mezin dide avakirina makezagoneke nû ya demokratîk, piralî, azadîxwaz û
nenavendî, li ser esasên bingehîn ên hiqûqa gerdûnî.
Partiya me bang li hemû
pêkhateyên Kurdistanî dike ku helwesteke hevbeş nîşan bidin û bi hev re
têbikoşin da ku daxwazên bingehîn ên gelê Kurd di destûra nû de cih bigirin.
Ji aliyê din ve Partîya me ji
şerê ku di van rojên dawîn de, di navbera Hamas û Îsraîlê de dest pê kir û
veguherî komkujiyeke gelekî nîgeran e.
Di vê şerê nabeyna her du alîyan
de, hejmara kesên jiyana xwe ji dest
dane hezaran derbas kiriye.
Di şer de kuştina sivîl, jin û
zarokan sûcê dijê mirovahiyê ye. Divê demildest ev şerê ku veguherî komkujî û
wehşetê bê rawestandin. Divê aliyên navneteweyî, bi taybetî Rêxistina Neteweyên
Yekbûyî, ji bo bidawîkirina vî şerî demildest mudaxele bikin.
Partîya me di esasê xwe de li
dijî her cure şîdet û şer e. Pirsgirêkên di navbera Filistîn û Îsraîlê de, ne
bi şer, divê bi rêbazên siyasî û danûstandinan bên çareserkirin.
09.10.2023
Partiya Sosyalîst a Kurdistanê
(PSK)
Meclîsa Partiyê
Seyîd Riza û Hevalên Wî Nemîr İn
Erdoğan Kürdlerden Özür Dilemelidir
Kayyım Siyaseti Geri Döndü
Siyaseta Danana Kayum Paşve Vegeriya
Divê Alî Çeven bê berdan
Ahmet Özer’i Yanlız Bırakmayalım Partiya Sosyalîst a Kurdistan © 2022