PSK-Partiya Sosyalîst a Kurdistan

» Gündem
» Basın Açıklamaları

PSKê Di Rîya Azadîyê da Bû 50 Salî Bi heman kelecan, hêvî, cesaret û bawerî têkoşana me berdewam dike

Partiya Sosyalîsta Kurdistan (PSK) 05.10.2024ê civîna Meclisa Partiyê ya asayî pêkanî, babetên di rojeva xwe da û pêşhateyên siyasî ku li herêm û Rojhelata Navîn diqewimin nirxand û biryar da ku encamên wê bo raya giştî belav bike.

Şerê ku salêk berê (07ê Çiriya Pêşin 2023) di navbeyna Hemas û İsrayîlê da qewimî roj bi roj dijwartir dibe û ber bi şerekî herêmî ve bi lez pêş dikeve. Di encama êrişên İsrayilê bo ser Xezzeyê bi 10 hezaran kesên sivîl jiyana xwe ji dest dan, bi rêjeyek mezin cihên niştecîbunê xirabûn, bi sed hezaran Filistînîyan ji neçarî koç kirin. Ev şerê hanê hêdî hêdî ji qalibê şerê Hemas û İsrayîlê derdikeve dibe şerê İsrayîl û Îranê û hêzên tundrew yên bi Îranê ve girêdayî. Daxwazên Rejima Îranê yên pawanxwaz û meshebî yên emperyal Rojhelata Navîn bi ber şerekî giştî ve pal dide.

Partiya me nîgeranê jidest dana canê kesên sivîl yên vî şeri ye. Partiya me di çarçoveya prensîbên exlaqî da pişgiriya hewlên çareseriyek di bingehê wekheviyê da bo meseleya Filistînê dike. Partiya me bang li civaka navdewletî dike ku pêşiya siyaseta serkutkirin, şoven û erişkar ya rejima İranê bigirin ku li navxwe û derve dimeşîne.

Guman têda nîne ku yek ji sedemên bingehîn yên şer û bê aramiya li Rojhelata Navîn meseleya Kurd û Kurdistanê ye. Neheqiyek dîrokîye ku gelê kurd ji hemî mafên neteweyî bê par hatiye kirin, welatê wan hatiye parçekirin, gelek caran ketiye ber komkujîyan û hatiye qirkirin. Ev politikayên qirkirin, haşatî û asîmilasyonê li hember gelê Kurd têne birêvebirin hem bê aramî û şer dixulqîne, hem jî guhnedan, tune hisabkirina prensîbên aştî û wekheviyê yên gerdûnî ye.

Di vê çarçoveyê da partiya me giringiyê dide zaminkirina destûrî ya deskeftên kurdên li Suriyê bi dest xistî. Lazim e hewlên dagirkirin û êrişa beramber Herêma Kurd ya Suriyê bi dawî bibin. Jibo parastina deskeftên heyî û pêkanîna rêveberiyek neteweyî ya rewatiyek bi hêz, divê hemî aliyên Kurd xudan têgehiştinek bi berspiryarî ya çêkirinê bin.

Politikayên Îranê yên dagirkarî li beramberê wê nerazîbûn û muxalefetek navneteweyî zêde dike. Di vê pêvajoya hestyar da yekitiya neteweyî ya aktoren siyasî yên Rojhelatê Kurdistanê dê bibe faktorek bihêz yê hilweşandina rejimê. Avakirina demokrasiyê li Îranê, azadiya Rojhelatê Kurdistanê bi hevkarî û tifaqek berfireh ve mumkîn e.

Di nav bayê şerê li Rojhelata Navîn da 20ê Meha Çirîya Pêşîn ya 2024an li Herêma Kurdistana Federe hilbijartinên perlemantoyê dê bêne kirin. Di wextek ku Hikûmeta Federal ya İraqê jibo nehêlana qewareya Herêma Kurdistanê kar dike, hewlên jibo lawazkirina statûya Kurdistana Federe û qutkirina beşê budçeyê, encamdana hilbijartinên Herêma Kurdistanê giringtir dike.

Hilbijartinên 20ê Çiriya Pêşîn ku dê bêne kirin, jibo hikûmetek bihêz û avakirina deshilatek merkezî derfetek dîrokî ye. Partiya me baweriyek xurt bi hindê heye ku hilbijartinên li Herêma Kurdistanê wê di rewşek demokratik û aştiyane da, bi awayek şehyana demokrasiyê da pêk bên. Hilbijartinên ku di rewşek demokratik, azad û aştiyane da pêk bên, hem dê rewatiya perlemanê pêk tê zêdetir dike, hem jî derfetê bo derketina iradeya azad ya gel desteber dike. Perlemana Kurdistanê ku bi îradeya bihêz ya ji hemî pêkhateyên kêmnetewe û olî pêk bê, dê baştir serederiyê ligel kêşe û gefên rû bi rû bûyî bike.

Partiya me hêvî dike ku hilbijartinên perlemantoyê yên 20ê Çiriya Pêşîn di keş û hewayek demokratik da derbas bibe û em piştrast in ku encamên ku derdikevin dê standardên demokratik yên Herêma Kurdistana Federe bi hêztir bike.

Meclisa Partiya me carek dî binê qeyrana aborî ya li Tirkiyê, xizanî û kûrbuna hilweşîna siyasî û exlaqî xêz kir. Meclisa Partiya me destnîşan kir ku ev qeyranên pir alî di bingeh da ji ber şopandina politikayên şer û haşatiyê di meseleya Kurd da ne. Riya çareseriya wê jî di çêkirina destûrek ku hebûna gelê kurd û mafên neteweyî bi xweve digire da ye.

Meclîsa Partiya me di vê çarçoveyê da gengeşeyên li dor destûrek nû ji nêzîk ve dişopîne û pêdivî dibîne ku aliyê Kurd mudaxaleyê vê pêvajoyê bike. Ji derveyî niyeta deshilatê ya destûra nû, lazim e aliyên kurd helwestek hevpar pêşve bibin, jibo bicihkirina daxwazên gelê kurd yên neteweyî despêşxeriyê pêş bêxin. Jibo daxwazên neteweyî yên gelê kurd bêne rojevê, ev daxwaz bibin malê raya giştî û di vê babetê da piştevanî peyda bibe gengeşiyên destûra nû weke derfet bikar bînin.

Di heman wext da ev sal 50 saliya avabûna PSKê ye. Têkoşana PSKê ya 50 salî bo azadiya gelê Kurd, bi rûmet e, pîroz e, bi rêz e. Hezar silav jibo wan lehengên jin û piyaw ku mil danê, giyanê xwe feda kirine. Bi heman kelecan, heman hêvî, cesareta mezin û baweriya bêhempa têkoşana me ya berheq berdewam dike.

Meclîsa Partiya me jibo salvegera damezrandina 50 saliya PSKê pîroz bike, fedekarî, tecrube û têkoşana nîv qirnî di hiş û biran da bihêle li Kurdistan, Tirkiyê û Ewrupayê rêze çalaki û şahî amade kirine. Em piştrastin ku emê van çalakiyan bi gelê me bi awayek girseyî, coş pêkbînin

Gelê kurd xewna xwe ya azadiyê bi têkoşana 50 salan ya bi rûmet kire hêzek civakî. Amanca li pêşiya me hizra azadiyê bi azadiya Kurdistanê tacîdar bikin.

07.10.2024

Partiya Sosyalîsta Kurdistan

(PSK)

Meclîsa Partiyê

İçerik Başlıkları

Partîya Sosyalîst a Kurdistanê di 16-17ê Kanûna 2023an de li Amedê 3. konferansa xwe bi serkeftî li dar xist. Di Konferansa 3. emîn a PSKê de, ku ji Ewropa û Başûrê Kurdistanê delege amade bûn, geşedanên siyasî yên li Kurdistanê û herêmê hatin nîqaşkirin û helwesta siyasî ya ku wê di hilbijartinên herêmî yên 31ê Adara 2024an de bên lidarxistin hat nirxandin û biryar hat dayîn ku daxuyaniya jêrîn bi raya giştî re bê parvekirin.

Pirsa Kurdistanê bi hemû giranî û şewata xwe di navenda geşedanên Rojhilata Navîn de ye. Êrîşên dewletên kolonyalîst ên li dijî hebûn û destkeftiyên demokratîk ên gelê Kurd di demên dawî de zêde dibin. Ev polîtîkayên înkar, asîmîlasyon û îmhayê yên li dijî mafên netewî yên demokratîk ên gelê Kurd, atmosfera kaos, bêîstîqrar û pevçûnan li ser asta herêmê hîn kûrtir dike.

Rejîma şovenîst a teokratîk a Îranê, ku bi salan e bi rêbazên îdamê hewl dide berxwedana netewî ya Kurd li Rojhilatê Kurdistanê bifetisîne, di demên dawî de êrîşên xwe yên fîzîkî û zextên xwe yên dîplomatîk ji bo bi temamî tunekirina aktorên siyasî yên Kurd zêde kiriye.

Hêzên mezhebî û şovenîst ên li Iraqê êrîşên xwe yên li dijî destkeftiyên gelê Kurd, ku di Destûra Bingehîn a Iraqê de hatine garantîkirin, bênavber didomînin. Bi zextên siyasî, aborî û leşkerî dixwazin Herêma Federe ya Kurdistanê hilweşînin. Rêveberiya Bexdayê ji tirsa demokrasî, aramî û geşepêdana aborî ya Herêma Federal a Kurdistanê, roj bi roj hewlên xwe yên xapînok ji bo têkbirina statuya federe ya Herêma Kurdistanê zêde dike.

Li Herêma Kurdên Sûriyê gelê Kurd ne tenê rastî êrîşên leşkerî û fizîkî tên, çavkaniyên xwezayî yên li wir tên talankirin, jêrxaneya aborî tê wêrankirin û pêkhateya demografî tê guhertin.

Eşkere ye ku qeyrana piralî ya siyasî, aborî û çandî ya li Tirkiyê, ku di van salên dawî de her ku diçe kûrtir dibe, ji polîtîkaya înkar û pevçûnê ya di pirsa Kurd de tê meşandin derdikeve. Îsrara Tirkiyê ya di polîtîkayên xwe yên demdirêj ên pirsa Kurd de, ji çareseriya pirsgirêkê dûr, pirsgirêkê kûrtir dike û çareseriyê zehmet dike. Zext, tirsandin û êrîşan berdewam dike da ku di civaka Kurd de bibe sedema tirs û bêdengîyek navxweyî. Lê rastî cuda ye; siyaseta înkarker a dewletê dibe sedem ku hişmendiya netewî ya gelê Kurd gav bi gav zêde bibe û hesta jiyana bi gelên Tirk re kêm bibe.

Yanî polîtîkaya înkar û pevçûnê ya di pirsa Kurd de tê meşandin êdî nikare bê domandin. Koletî û zulm bi darê tivingan û bi zilmê heta hetayê li ser gelê Kurd nayê ferzkirin.

Partîya Sosyalîst a Kurdistanê çareserî û azadiya her parçeyekî Kurdistanê di yekîtîya hêzên netewî û demokratîk ên gelê Kurd de dibîne. Tu hêz nikare çongan li gelê Kurd ê ku li dora armanca azadiya netewî û yekgirtî dibe yek bişkîne.

PSK li gel wê yekê ye ku banga makzagona nû ya Serokkomar Erdogan wek firsend binirxîne û ji bo çêkirina makzagonek ku mafên bingehîn ên gelê Kurd tê de bin, bang li hemû aktorên siyasî yên Kurd dike ku dest bi însiyatîfek hevpar bikin.

Konferansa me bang li hemû aktorên siyasî yên Kurd dike ku ji bo xurtkirin, berfirehkirin û bidestxistina encamên xebatên qebûlkirina zimanê Kurdî wek zimanê perwerdehiyê û zimanê fermî, hestiyar bin.

Konferansa me destnîşan dike ku divê di şexsê rêberê Tevgera Kurd 1925an Şêx Saîd de li hember êrîşên piralî yên nijadperest û dijminane yên ku di van demên dawî de li dijî nirxên netewî yên Kurd hatine destpêkirin helwest û bertekek hevpar bê pêşxistin.

3. Konferansa PSKê mijara hilbijartinên herêmî yên ku wê di 31ê Adara 2024an de bên kirin bi berfirehî nirxand û gihîşt encamên pêwîst.

Di vê dema ku dewleta Tirk li dijî destkeftîyên netewî yên gelê Kurd êrîşek topyekûn pêk tîne, girîngiya hilbijartinên herêmî yên 31ê Adara 2024an zêdetir dike. Di pêvajoyek ku qeyûm ji bo şaredariyên hilbijartî yên Kurdistanê tên tayînkirin, îradeya demokratîk a gelê me binpêkirin, dengê wan tê qutkirin û partiyên Kurdistanî di nava dosyayên girtinê de mane, pir girîng e ku Kurd bi girtina hemû şaredariyan xwe bi rêve bibin.

Di vê çarçoveyê de, di hilbijartinên herêmî de hevkariya herî berfireh girîng û lezgîn e.

Hevkariya bi vî rengî divê li ser bingeha polîtîkayek hevpar û birêvebirina şaredariyek piralî, rengîn, demokratîk, tevkar modêla şaredarîya xwecîhî bê avakirin.

Damezrandina tifaqa ku tê de partî nasnameya xwe ya resen û xisletên xwe yên serbixwe biparêzin lê bi hev re tevbigerin, xwe ferz dike. Konferansa 3. ya Partîya Sosyalîst a Kurdistanê guncav dît ku li gor çarçoveya jorîn erka pêkanîna xebata hevkarîya hilbijartinan bide Meclîsa Partîya me.

16-17 Kanûn 2023

Partîya Sosyalîst a Kurdistanê

Konferansa 3.emîn

İçerik Başlıkları

En çok Okunan İçerik

Yorum Yaz