PSK-Partiya Sosyalîst a Kurdistan

» Gündem
» Basın Açıklamaları

Ger em di 31ê Adarê de bibin yek, em him dikarin xwe bi rêve bibin, him jî bajarên xwe bikin baxçeyên ziman û çanda Kurdî

Meclîsa Partîya Sosyalîst a Kurdistanê (PSK) di 7ê Çileya 2023an de civîya, mijara hilbijartinên herêmî yên ku wê di 31ê Adara 2024an de bên kirin nirxand û biryar da ku siyaseta me ya hilbijartinê, ku çarçoveya giştî ya wê di 3.emîn Konferansa PSKê a di 16-17ê Kanûna Pêşîn a 2023an de hatiye diyarkirin, bi dawî bike û encamên jêrîn bi raya giştî re parve kir.

Di pêvajoya hilbijartinên herêmî yên ku wê di 31ê Adara 2024an de bên kirin, gelê me û welatê me di pêvajoyek girîng re derbas dibe. Polîtîkayên înkar û tundî yên ku li ser gelê Kurd tên kirin di van deh salên dawî de ji her demê zêdetir zêde bûne. Îradeya gelê me bi polîtîkayên qeyûman ên ku bûne rûtîn tê paşguhkirin. Partîyên siyasî yên Kurd bi dosyayên cûr be cûr hatin girtin. Qada siyasî ya Kurdan teng bûye û bêhn nayê standin. Herî dawî kampanya heqaret û lînçê, ku bi teşwîqa dewletê li dijî nirxên netewî yên gelê Kurd hatiye destpêkirin, gihiştiye astek xeternak. Hebûn û nirxên netewî yên gelê me kirine hedefa êrîşên nîjadperest û şovenîst.

Hilbijartinên herêmî yên 31ê Adarê ji bo rawestandina êrîşên dijminane yên li dijî hebûna netewî ya gelê Kurd, nirxên wî yên pîroz û vîna wî ya azadîyê, derfetek girîng e. Li ser me ferz e ku em vê derfetê bikar bînin û pêvajoya înkar û çewisandina li ser gelê xwe paşve bixin.

Ger em di hilbijartinên di 31ê Adarê a 2024an de hêzên xwe bikin yek, em him dikarin xwe bi rêve bibin û him jî bajarên xwe bikin baxçeyên ziman û çanda Kurdî.

Ji bo vê jî pêdivîya me bi hevkarîyek hilbijartinê heye ku hemû hêzên me yên netewî yên demokratîk, cihêrengîya etnîkî, olî û çandî û kombûna rewşenbîrî bîne cem hev. Hemû aktorên me yên siyasî dikarin ji bo berjewendîyên hevpar ên gelê xwe bên cem hev, heman demê de jî taybetîyên xwe biparêzin û cudahîyên xwe wek dewlemendîyekê bihesibînin. Hevkarîya hilbijartinê ya berfireh, ne tenê wê bikaribe bajarên xwe bi dest bixin, belkî ji bo gelê me dikare bibe çavkanîyek mezin a bawerî û moralê û navendek balkêş. Hevkarîya hilbijartinan a bi vî rengî dikare di pêşerojê de ji bo tifaqên netewî yên mayînde û stratejîk jî bibe bingehek xurt.

Bê şik emê bi saya hevkarîyek berfireh a hilbijartinê, ya ku hesret û hêviya gelê me ye, rêveberîya hemû bajarên Kurdistanê bi dest bixin. Hêz û îradeya me heye ku em bajarên xwe yên ku ji alîyê fizîkî, dîrokî û çandî ve hatine hilweşandin ji nû ve ava bikin. Di destê me de ye ku em hilbijartinên herêmî yên 31ê Adarê bi şîara “Li bajarên Kurdan cihê tu partîyek sîstemê nîne” veguherînin referandûmê. Em dikarin bi encamên hilbijartina 31ê Adarê nîşan bidin ku em dikarin hem bajarên xwe hem jî welatê xwe bi rê ve bibin.

Hevkarîya hilbijartinê ya ku hemû potansîyela siyasî ya Kurd tê de hebe, divê li gor bernameyek ku daxwazên gelê Kurd ên bingehîn, lezgîn û demokratîk ên netewî di nav xwe de dihewîne pêk bê.

Naskirina nasnameya gelê Kurd di asta destûrî de,

Di qada giştî de naskirina zimanê Kurdî wek zimanê perwerdeyê û qebûlkirina wî wek zimanê fermî,

Bi hemû dewlemendîya xwe ji nû ve vejandina ziman, çand û dîroka Kurdî,

Aşkerekirina gorên rêberên Kurd ên windakirî,

Vegerandina navên Kurdî yên hemû cîh û warên dîrokî, erdnîgarî û çandî,

Bidawîkirina dosyayên girtina partîyên siyasî yên Kurd û tolhildana ne rewa ya li dijî kadroyên siyasî yên Kurd,

Naskirina mafê gelê Kurd ku di welatê xwe de xwe bi rê ve bibe û hwd. di nav hevkarên

hilbijartinê de xalên hevpar bin.

Hevkarîya Kurd a ku di hilbijartinên 31ê Adarê de bê avakirin, ne tenê di mijara maf û azadîyên bingehîn de dikare têkoşînek hevpar derxe holê, di heman demê de rêveberîyên herêmî jî ji bo pêkanîna van daxwazan veguherîne fersendekê.

Meclîsên bajaran wê di bin rêveberîya hêzên neteweya demokratîk a Kurd de bibin meclîsên herêmî. Meclîsên ku emê bi rê ve bibin xwedîyê erkek dîrokî ne ku dikare nasnameya Kurdî bidin naskirin, Kurdî wek zimanê perwerdeyê vejînin, navên Kurdî vegerînin, di warê ziman, çand û dîroka Kurdî de xebatên bi bandor bikin, bîranînên mezinên Kurd payedar bikin û ji bo nifşên nû yên saxlem, berpirsiyar û hişmend bigihînin, dikare erkek dîrokê hilgire ser milên xwe.

Bi rêveberîya meclîsên hevpar emê hewl bidin ku meclîsên herêmî ji bin wesayeta meclîsa navendî derkevin û bandora meclîsa navendî ya li ser meclîsên herêmî dakeve asta herî kêm. Ji bo ku walî, qeymeqam û midûrên polîsan bi hilbijartinan bên ser desthilatdariyê wê têkoşînek çalak bê meşandin. Bi girtina rêveberîya hemû bajarên me, di hilbijartinên herêmî yên 31ê Adarê de, em dikarin berê pergala sîstema ezperestî û navendperestîyê bidin sîstema navendî ya ademî. Heger em di hilbijartinên 31ê Adarê de serkeftinek mezin bi dest bixin, em dikarin bi awayekî defakto bibin xwedî derfet ku em welatê xwe bi rê ve bibin. Encamên hilbijarînên herêmî yên 31ê Adarê dikare sîstema navendperest û otorîter, a ku çavkaniya hemû pirsgirêkan e, veguherîne federalîzmê.

Tiştê ku ji bo vê yekê bê kirin, divê hemû aktorên siyasî, alîyên ku di tekoşîna gelê Kurd de dibêjin em hene, bi berpirsiyarî, bi pêşbînî û li ser bingeha berjewendîyên netewî, nêzîkatîyekê raber bikin.

Partîya Sosyalîst a Kurdistanê (PSK) ji bo bicîhanîna armancên ku li jor hatine diyarkirin wê bi hişmendî û berpirsiyarîyek mezin helwest û têkildarîya xwe berdewam bike.

08.01.2024

Partîya Sosyalîst a Kurdistan

(PSK)

Encumena Partîyê

İçerik Başlıkları

En çok Okunan İçerik

Yorum Yaz